Rev 17 | DOB | STEP | 'Enega anilose nidi sebeni ma idi keiga sebeni Yaubada 'i'ebwa'ediya, 'ebweuna 'ediyega 'imai ga 'ieonegu, 'igwae, “'Umai be yada e'itayo Yaubada 'ina bwa'omatana tosogala 'ai'aila mewainena 'enaya, ta tosogala nina 'ana mwalatoi nate 'asa sinabwana bwasi yauyaudi tupitupidiya si'abina.

Revelation of John 17

Waine tosogala diidiga

1 'Enega anilose nidi sebeni ma idi keiga sebeni Yaubada 'i'ebwa'ediya, 'ebweuna 'ediyega 'imai ga 'ieonegu, 'igwae, “'Umai be yada e'itayo Yaubada 'ina bwa'omatana tosogala 'ai'aila mewainena 'enaya, ta tosogala nina 'ana mwalatoi nate 'asa sinabwana bwasi yauyaudi tupitupidiya si'abina. 2 Ta bale'u 'ana kiniyao loelata 'ena siewaiwai tosogala nina ma'ediya, ga 'enega me bale'u yaudi loelata bubunina sinumena ga siekabaleya.”

3 Ga Yaluyaluwa Tabuna 'enega yalotoogu 'atuwa anilose nina 'i'au'ewegu sena mwatui daitaya, ga waine 'ebweuna ya'itena yobai bweyabweyalina 'igeluna, ta yobai nina bwalana maibo'ana 'enaya esana to'umalidi si'etoladidi, ta bulubuluna 'adi yau sebeni, be kunanao 'adi yau sanau.

4 Ta waine nina 'ana 'oama 'ina bweyabweyala 'atuwa toesaesao 'adi 'oama, ta 'ana iyaiyalao goula be gulewa esaesadi be pakuyao, ta nimanaya keiga goula 'igiyaina, ni'atu 'iloemaena bubuna to'umalina 'enega, loelata manuna. 5 Ta debanaya 'ana esana si'etoladina, 'ana kunuwadawada, 'igwae,

“Babiloni sinabwana, nate tosogalao be toloelata gadiluluyao sinadiya.”

6 Ta waine nina ya'itena, ni'atu Yaubada 'ina tomotaiyao be Yesu 'ana tosimanao laladi 'inumena, ga 'enega 'iekabaleya, ga nuwagu 'iowana waine nina 'ana 'ita manuna.

7 Ta 'enega anilose 'ieonegu, 'igwae, “Geya'abo nuwayo 'iowaowana. Yada li'ami 'emuya to'ase waine nina ta yobai nina 'igelunaya, tauna bulubuluna sebeni be kunanao sanau, 'adi mwalatoi. 8 Yobai nina 'u'itena lowa mayawasina ta ni'atu 'imwawasa, be ma'etamo 'iapwesama gaula nina sinabwana 'enega be 'itatauya, be 'enega sigieto'umali 'ai'aili. Ta tomota me bale'u, yaisigedi taudi 'adi esana Yaubada nigeya 'i'eto'etoladidi yawasi bukina solanaya, tuta nina bale'u 'ana mweluluwa'unu 'enaya, taudi yobai nina 'etamo sida 'ita be nuwadi 'iowana, manuna lowa mayawasina ta gete tugai ni'atu 'imwawasa, ta ma'etamo 'iapwesa limanama.

9 “'Abo sinasinapu 'emuya, 'uda mwalatoni 'aene bulubulu nidi sebeni nate 'oya 'adi yau sebeni, 'oya nidi 'ediya waine nina 'imiyatowa, ta 'ana mwalatoi wate kiniyao site sebeni, 10 ta nima 'ediyega ni'atu sibe'u, ga 'ebweuna 'etamo 'iloiloina, ta 'ebweuna ma'etamo 'ida apwesa be 'ina tuta kukupana namo 'ida miyami.

11 Ta kiniyao nidi sebeni, 'ebweu wate kini ma'edi, 'idi boda solanaya, tauna yobai nina lowa mayawasina ta yawasina 'igumwala, be ma'etamo 'itatauya be 'aene sida gieto'umali 'ai'aili.

12 “Ta kuna nidi sanau 'u'itediya, nate kini 'adi yau sanau, taudi nigeya sie'ae'ale be siloina, ta ma'etamo sida loina tuta kukupana namo 'enaya, yobai nina ma'ediya.

13 “Taudi site sanau nidi 'idi nuwanuwa leleleya, nuwanuwadi be 'idi waiwai ta 'idi loina sida tagwaledi yobai nina 'enaya. 14 Be 'enega Lami 'enaya sida losaiya, ta Lami nina 'ida ewaiwai sinedi, manuna tauna 'inapwanao 'idi 'inapwana, ta kiniyao 'idi kini, ta wate taudi 'ina esinuwega 'ibwauyedima, taudi 'ana tomuliya 'ai'ailao ma'enao.”

15 'Enega anilose 'eguya wate 'iona, “Bwasi nidi ni'atu 'u'itediya, ta 'ediya waine tosogala nina 'imiyatowa, 'adi mwalatoiyao nate bodao be pwaluyao be susuyao be 'enanao. 16 Ta kuna sanau be yobai nina 'u'itedi taudi ma'etamo tosogala sietalauwale, be 'ina gwegweyao maibo'adi si'ewadi be kakaena 'ida miyami, be wate esiyona si'a'ani, ta lulunao kaiweyega sigabu. 17 Manuna Yaubada ni'atu 'atediya 'ienuwa sa'uyedi be 'ina nuwanuwa sida guinuwe, nate 'idi guinuwa leleleya be 'idi waiwai ta 'idi loina yobai nina si'ebwa'ena, be tauna 'ida loina 'ana laba Yaubada 'ina onao nidi 'iguinuwedi.

18 “Ta waine nina 'u'itena, tauna 'asa sinabwana, ta 'iloiloina bale'u 'ana kiniyao maibo'adi 'ediya.” 13:8v14 Et 19:11-16,19-20v16 Et 18:8